O número de casos activos de coronavirus na provincia de Lugo aumentou a 475, oito máis ca onte, segundo o reconto ofrecido este venres polo Sergas. Nas últimas 24 horas localizáronse 30 positivos novos, déronse 21 altas e produciuse un falecemento, o dun home de 85 anos ingresado no HULA. Segundo informou o goberno local de Viveiro, no municipio viveirense mantense a estabilidade, con doce infectados e en nivel amarelo -por sete PCR positivas na última semana-, sen que se detectasen contaxios nin curacións.
Segundo concretou a responsable do Hospital Público da Mariña, María José Cortés Canay, no municipio conflúen “varios contaxios familiares inconexos“, cunha pequena transmisión nalgún caso que non se detectou fóra do ámbito familiar. “Estanse facendo os estudos de contactos, pero son casos independentes entre eles, algúns relacionados coa volta dos estudantes universitarios ás súas casas”.
Dos 475 casos de Covid-19 na área lucense, 24 permanecen ingresados: 21 deles son atendidos no HULA, entre eles os cinco lucenses que requiren de coidados intensivos; Hospital Público da Mariña, centro hospitalario de Monforte e Polusa teñen un doente infectado.
Coa morte rexistrada onte, no histórico da provincia documéntanse 92 falecementos, con 2.937 altas e 3.504 positivos acumulados.
RESIDENCIAS
No tocante ás residencias da Mariña, hai un único positivo confirmado onte, no xeriátrico de DomusVi Viveiro. Segundo concretou o Concello, a traballadora contaxiada levaba días sen traballar tras detectarse un positivo entre os seus familiares directos. Por outra banda, a obreira do centro de maiores San Bartolomeu (Xove) que contraeu o Covid-19 recibiu a alta.
MAIORES
129 Residencia DomusVi Lugo (Outeiro de Rei)
TRABALLADORES
2 Residencia Orpea Lugo (Lugo)
9 Residencia O Incio
11 Residencia DomusVi Lugo (Outeiro de Rei)
1 Residencia DomusVi Viveiro
CENTROS EDUCATIVOS
Nos centros educativos da comarca tampouco se localizan casos. Podes consultar o listado a nivel galego no seguinte pdf. 20201016DatosEscolasInfantísCentrosEducativos
808 FALECEMENTOS A NIVEL GALEGO
A Dirección Xeral de Saúde Pública da Consellería de Sanidade informa que, na última actualización, o número de casos activos de coronavirus en Galicia é de 4.680 (111 máis); deles 784 son da área da Coruña, 475 da de Lugo, 1.601 da de Ourense, 401 da de Pontevedra, 592 da área de Vigo, 660 da de Santiago, e 167 da de Ferrol.
Do total de pacientes positivos, 41 están en Uci, 231 en unidades de hospitalización e 4.408 no domicilio. Polo de agora, en Galicia hai un total de 22.788 persoas curadas, rexistrándose 808 falecementos. O número de PCR realizadas é de 572.690.
