O Concello de Xove, na Mariña Lucense, é un dos municipios da provincia cunha maior incidencia de Covid-19, con máis de 1.000 casos por cada 100.000 habitantes, unha circunstancia que mantén “preocupado” ao seu rexedor, Demetrio Salgueiro.
Xove documenta 67 positivos confirmados nos últimos 14 días. Na residencia San Bartolomeu, segundo concretou este xoves a Xunta de Galicia, confirmáronse 16 casos novos desde a anterior actualización, once usuarios e cinco traballadores do centro de maiores.
Deste xeito, no xeriátrico xovense acumúlanse un total de 26 persoas contaxiadas, 16 maiores e dez traballadores. Segundo concretaron fontes da Fundación San Rosendo, que xestiona o centro de maiores, os usuarios infectados están a ser trasladados a Ourense, á residencia de Os Gozos, onde permanecen nunha planta illada, ou ben ao Centro Galego de Desenvolvemento Integral (Cegadi) de Santiago de Compostela. Os operarios permanecen confinados.
A previsión é que o número de contaxios na residencia poida aumentar, dado que se efectuou un cribado masivo o pasado luns do que polo momento non trascenderon todos os resultados.
O alcalde constatou que boa parte dos contaxios no municipio teñen as súas orixes en “núcleos familiares”. “Temos familias con cinco ou seis casos, e isto elevou a incidencia”, explicou.
Do mesmo xeito, influíu a alta taxa de infectados na “residencia de maiores, con ao redor de trinta casos positivos. Trátase dun xeriátrico moi grande e que neste caso distorsiona un tanto os datos, pero o certo é que é unha situación preocupante polo colectivo ao que afecta”, apuntou Salgueiro.
“HAI MENOS XENTE POLA RÚA” E PARA A HOSTALERÍA E O COMERCIO É UN MOMENTO “COMPLICADO”
O alcalde de Xove confesa que hai “preocupación” entre os seus veciños, o que se traduce en que “hai menos xente pola rúa. A xente está preocupada. Vemos a facilidade do contaxio, tamén tivemos algún caso illado que non se sabe moi ben de onde veu. A transmisión do virus é moi fácil que se produza e seguimos apelando á responsabilidade de todos os veciños para evitar ao máximo os contaxios”, remarcou.
Salgueiro tamén lamentou “a difícil situación” da hostalería e o comercio locais, que “viñan de pasar xa un ano moi complicado” e padecen polo momento o peche perimetral e as restricións no municipio nun momento de vacacións e de reactivación do consumo.
