O Concello pecha a escola infantil de Viveiro alomenos ata o 31 de xaneiro pola situación epidemiolóxica

O goberno local concreta que último dos positivos do centro detectouse onte, domingo, polo que dende entón están confinados unha aula de dez pícaros e maila súa profesora

Gardería de Viveiro. AXM

O Concello de Viveiro acordou o peche temporal da escola infantil municipal a partir de mañá, martes 19 de xaneiro e ata, mínimo, o 31 de xaneiro. O goberno local tomou esta decisión como medida preventiva, dada a situación epidemiolóxica no municipio, con 271 positivos confirmados nos últimos 14 días.

Segundo concreta o executivo municipal, “as últimas probas realizadas detectaron casos de Covid-19 en usuarios da escola infantil municipal. O último dos casos positivos do centro detectouse onte, domingo, polo que dende entón xa están confinados unha aula de dez pícaros e maila súa profesora. Trala valoración por parte do goberno local coa dirección do centro, tendo en conta que se trata de nenos moi pequenos que non empregan máscara, decidiuse que o máis acertado sería proceder a este peche temporal”, engade.

Dende o goberno local insisten en que este peche “é unha medida necesaria, tendo en conta a situación sanitaria do municipio e as características da escola, que acolle a nenos e nenas de 0 a 3 anos. Con esta medida, o goberno local pretende garantir a seguridade dos usuarios e traballadores da escola e velar pola saúde pública”, argumenta.

O Concello de Viveiro adoptou esta decisión xa que ten competencias sobre a escola infantil, que é un servizo municipal. “Con respecto aos colexios de infantil e primaria, o goberno local non ten competencias xa que dependen da consellería de Educación“, aclara na nota.

O peche temporal está previsto, inicialmente, do 19 ao 31 de xaneiro. Con anterioridade ao día 31, o goberno local valorará a necesidade de prorrogar da suspensión, en función da situación epidemiolóxica nese momento.

RESPOSTAR

Please enter your comment!
Please enter your name here