A directora de Augas de Galicia, Teresa Gutiérrez, pediu este martes unha maior “axilidade” á Dirección Xeral da Costa e do Mar do Goberno central cos seus informes para acometer a nova estación depuradora de augas residuais (EDAR) de Burela, xa que unha demora máis aló de 2023 faría “perder” financiamento da Unión Europea.

Durante a súa intervención na Comisión 2ª de Ordenación Territorial, Obras Públicas, Medio Ambiente e Servizos do Parlamento de Galicia, ao responder a unha pregunta do deputado do PP José Manuel Balseiro, Gutiérrez defendeu a actuación da Xunta para dotar a Burela dunha nova depuradora e cumprir coa normativa europea de augas urbanas.

Malia en que insistiu en que as competencias neste asunto son “municipais”, a directora de Augas de Galicia dixo comprender que este tipo de investimentos teñen “unha gran envergadura” e os concellos “requiren asistencia técnica e económica”.

DÚAS ACTUACIÓNS

O proxecto global para Burela consta de dúas actuacións no municipio, a mellora da rede de saneamento e a execución da nova estación depuradora de augas residuais.

En relación á mellora da rede de saneamento, Gutiérrez precisou que Augas de Galicia comezará ao longo deste mes a supervisión do proxecto, “cuxa redacción está a piques de rematar“.

Detallou que se prevé a instalación dunha estación de tratamento e bombeo de augas residuais na zona portuaria para concentrar o caudal recollido polos colectores da contorna do porto e permitir o seu bombeo á nova depuradora.

Neste sentido, Gutiérrez apelou á colaboración do Concello de Burela para “axilizar os trámites” ante o departamento estatal, que debe emitir o informe necesario para avanzar cara a estas “obras estratéxicas”.

No que se refire á segunda actuación, a nova depuradora, a directora sinalou que “xa se licitou a redacción do proxecto e se procederá en breve á súa adxudicación“.

Gutiérrez relatou que a Xunta deixou “todos” os seus informes sobre a EDAR listos en marzo de 2019, pero que non foi “ata marzo de 2020” cando Costa emitiu o seu informe.

CAMBIO DE UBICACIÓN

Con todo, segundo criticou a directora de Augas, este informe suscitaba un “cambio de ubicación” da depuradora malia que a localización prevista inicialmente “é compatible coa normativa de Costa”, asegurou Gutiérrez.

“A ubicación foi consensuada co Concello e con Portos de Galicia. É unha ubicación completamente conforme á normativa”, recalcou, para xustificar a negativa da Administración galega a este cambio que “produciría un atraso doutros tres anos“.

Así as cousas, a directora de Augas de Galicia dixo esperar que o Estado cumpra “un compromiso” non só coa Xunta, senón tamén “cos concellos da Mariña”. “Se non é posible, perderíanse os fondos, o cal sería un desastre”, concluíu.

BALSEIRO: “O PSOE NON QUERE QUE SEXA UNHA ADMINISTRACIÓN DO PP A QUE A CONSIGA”

Pola súa banda, Balseiro, que suscitara a pregunta, destacou que a Xunta é “a única administración que presta axuda aos concellos nesta materia”, fronte aos “atrancos” do Estado e unha Deputación de Lugo “desaparecida”.

“O Partido Socialista non quere que sexa unha administración gobernada polo PP, como a Xunta, a que resolva o problema da depuradora de Burela”, apostilou.

ORZAMENTOS

Ao longo dos últimos anos, a Xunta recibiu críticas da oposición polos atrasos na consecución destes proxectos, especialmente no tocante ás cantidades destinadas á depuradora nos sucesivos orzamentos do Goberno autonómico -250.000 euros no 2018, arredor de 780.000 finalmente non executados para o exercicio 2019, outros 250.000 euros para 2020-, cando a obra estaba orzamentada en nove millóns de euros. Así, sucedéronse as alertas sobre a posible perda de fondos europeos.

En novembro do ano pasado, a Xunta non prevía comezar a construción da EDAR ata o 2022.