O BNG de Burela cualifica de “menosprezo intolerable” á veciñanza do municipio o borrador dos orzamentos da Xunta de Galicia, que destinará 250.000 euros para a estación depuradora de augas residuais (EDAR). Trátase, resalta o voceiro dos nacionalistas, Mario Pillado, dun investimento “insuficiente” é que é “tan baixo como o presupostado no exercicio anterior, que por certo non se executou”.
O grupo municipal do BNG ve “con asombro” as contas da Xunta, “anunciadas a semana pasada como se esa cantidade fose suficiente para solucionar o problema gravísimo que temos aquí en Burela”.
A falta de capacidade da actual EDAR vén provocando problemas, especialmente acusados nas épocas de chuvia. O orzamento previsto para a nova instalación, que se ubicará nun solar fronte ao club náutico, supera os nove millóns de euros.
Pillado considera que a Xunta non dedica máis orzamento “por motivos exclusivamente políticos, como se vén demostrando nos últimos tempos”. O voceiro do BNG argumenta que o Partido Popular (PP) ten unha actitude discriminatoria, pois “se non lles votas, non mereces un servizo primordial como a depuración de augas residuais”.
O voceiro dos nacionalista burelaos asegura que “chama a atención” o “silencio do PP de Burela con este tema. Tan esixente outras veces, agora o Partido Popular opta por estar calado mentres a veciñanza segue a aguantar esta situación, da que é evidente que xa está farta”.
CENSURA A “PARSIMONIA” DE LLANO Á HORA DE ESIXIR INVESTIMENTOS
“Pasan os anos e a veciñanza ten que seguir aturando un problema de primeira orde”, lamenta Pillado, que tamén responsabiliza en parte ao goberno local en funcións do PSdeG-PSOE pola súa “total e absoluta parsimonia”.
“En catro anos prometéronnos moitas veces que todo avanzaba ben pero logo nunca se fai nada e sempre se van retrasando as datas sen que o alcalde, Alfredo Llano, cumpra coas súas responsabilidades esixindo das diferentes administracións compromisos, financiamento e investimentos. Xa non se pode esperar que obteña solución algunha coa súa xestión”, continuou Pillado.
ERMIDA LAMENTA A FALTA DE “COMPROMISO” COA EDAR DE SAN MIGUEL
Pola súa banda, a alcaldesa de Barreiros, Ana Ermida, criticou tamén que as contas da Xunta non reserven ningunha partida para a nova EDAR de San Miguel de Reinante, para a que o goberno local solicitou financiamento tanto ao Goberno galego como ao Executivo central.
“Non hai nada nominativo para Barreiros”, lamenta a rexedora, que cre que “incluír unha partida aínda que fose inicial ou pequena demostraría o compromiso real coa EDAR de San Miguel, e tamén nos daría pé para negociar con outras administracións”, tendo en conta que se trata dun investimento de 3,3 millóns de euros.