O Servizo Galego de Saúde (Sergas) informou este luns de que todas as probas PCR realizadas no cribado masivo da Pontenova, un total de 223, tiveron resultado negativo. Segundo as mesmas fontes, anotáronse para as análises un total de 227 persoas, acudindo finalmente 223.
O cribado tivo lugar o pasado domingo, sendo de carácter voluntario e centrándose principalmente nas persoas que traballan de cara ao público, en oficinas, supermercados, comercios ou gasolineiras.
Segundo o reconto ofrecido este luns polo Sergas, con datos actualizados onte ás 18.00 horas, A Pontenova conta once positivos confirmados nas últimas dúas semanas. O municipio é o único da Mariña con dobres díxitos e nel aplícanse restricións específicas de mobilidade, non podendo consumirse no interior dos locais de hostalería.
