Durante esta ponte festiva terá lugar a posta de largo do remodelado campo de fútbol municipal Pepe Barrera. Debido á situación sanitaria que estamos a vivir non haberá acto de inauguración. O Ribadeo FC xogará mañá (contra o Foz) e o domingo (contra o Residencia) e algunhas categorías da SD Ribadeo farán o propio o sábado. Está permitido o acceso de público cumprindo con todas as normas sanitarias en vigor en cada momento: aforamento, toma de temperatura e de datos persoais ou uso de máscara. O alcalde ribadense, o nacionalista Fernando Suárez Barcia, subliña que se trata “dun dos mellores campos de herba natural do país, tras a importante remodelación á que foi sometido”.
O rexedor ribadense dixo que “ben é certo que a pandemia foi cambiando moitas cousas, desgraciadamente algunhas moi positivas, outras que non teñen a fin de contas tanta importancia, pero que tamén eran simbólicas como pode ser o tema das inauguracións”.
CASE MEDIO MILLÓN DE EUROS
Suárez Barcia sinalou que “o campo de fútbol Pepe Barrera leva varios meses amañado, despois dunha operación profunda de rehabilitación e de arranxo con moito diñeiro público que se meteu alí, e de facto non foi inaugurado. Tampouco vai ser porque pensamos desde o goberno municipal que a mellor maneira para inauguralo é precisamente que nesta fin de semana poidan empezar a xogar as persoas, tanto do Ribadeo FC como da SD Ribadeo, rapaces xuvenís, cadetes ou o primeiro equipo, e poidan usar o que vai ser e o que é un dos mellores campos de herba natural do noso país. Desde logo ningún outro, a día de hoxe, ten a calidade do terreo“, afirmou.
A Deputación de Lugo achegou 140.000 euros para as obras, 235.000 euros o Concello e 46.000 euros a Xunta de Galicia.
O alcalde ribadense engadiu que “despois de que nos últimos dez anos desde o goberno municipal tivéramos que sufrir todo tipo de queixas e de críticas, sempre construtivas, de que era un pataqueiral, finalmente cun montón de apoio económico da Deputación, con escaso apoio económico da Xunta e cunha parte importantísima do Concello de Ribadeo, puidemos arranxar integralmente este campo de fútbol Pepe Barrera”.