EFE. O home de 48 anos, natural de Cabo Verde, que este martes sentou no banquiño dos acusados da Audiencia Provincial de Lugo como suposto autor da violación dunha muller na localidade lucense de Burela, o 28 de marzo de 2017, negou hoxe os feitos que se lle imputan e insistiu en que as relacións “foron consentidas”, segundo informou o avogado que leva a súa defensa, Emilio Rodríguez.
“Hai dúas versións contraditorias”, dixo o letrado a EFE, porque a suposta vítima, que no momento dos feitos tiña sobre “21 anos“, dixo que a forzou, pero el négao e afirma que as relacións foron “consentidas“.
Posteriormente, aclarou o letrado antes de entrar na vista oral, a suposta vítima “retirou a denuncia“, pero o Fiscal “mantivo a acusación“, polo que no xuízo trátase de demostrar “que as relacións foron consentidas e que polo tanto non houbo violación”.
OITO MESES EN PRISIÓN PREVENTIVA
Por mor do sucedido, o home permaneceu case oito meses en prisión preventiva por orde do Xulgado de Primeira Instancia e Instrución Número 1 de Viveiro.
O ministerio fiscal pide para o acusado nove anos de prisión, dez de liberdade vixiada cando cumpra a súa condena de cárcere, a prohibición de achegarse á vítima ou comunicarse con ela durante dezaseis anos e unha indemnización polos “danos morais” de 18.000 euros.
Segundo a Fiscalía, o acusado abordou á vítima “con ánimo libidinoso” e arrastrouna “a un lugar afastado”, onde lle tapou a boca e aproveitou a súa forza física para consumar a agresión sexual.
Unha vez detido, o Xulgado de Primeira Instancia e Instrución número 1 de Viveiro acordou “prisión provisional comunicada e sen fianza para o acusado” o 31 de marzo de 2017.
Finalmente, quedou en liberdade provisional o 20 de decembro do mesmo ano, pero retiróuselle o pasaporte para evitar que abandonase territorio español e impúxoselle a obriga de comparecer periodicamente no xulgado.
