San Cibrao leva 200 MW da poxa de interrompibilidade, 40 menos ca na anterior e a peores prezos

Alcoa prevé un maior gasto en enerxía tras quitar cinco bloques de 40 MW nunha subasta na que o prezo medio dos paquetes meirandes baixou 8.500 euros por MW e ano

Instalacións de Alcoa en San Cibrao. EFE/Eliseo Trigo

Alcoa fai unha lectura “negativa” da subasta de interrompibilidade celebrada ao longo desta semana en Madrid, na que obtivo un total de cinco bloques de 40 MW (200 MW) para o complexo industrial de San Cibraoun menos dos acadados o pasado mes de decembro na poxa para o primeiro semestre deste ano.

Daquela, a multinacional, á que o Goberno central concedera a posibilidade de concursar tamén polas fábricas de Avilés e A Coruña, en proceso de peche de non atoparen comprador antes do 30 de xuño, conseguira dez (400 MW) dos 21 bloques de 40 MW en xogo, que repartiu entre San Cibrao -seis paquetes- e as factorías coruñesa e avilesina -dous para cada unha-.

Segundo publicou daquela Cinco Días, Alcoa pugnou en decembro de 2018 por nove bloques para San Cibrao. Aínda que fontes da multinacional non desvelan a cantidade de paquetes aos que optou, a cifra puido ser similar nesta subasta, na que se ofertaron cinco produtos menos, un total de 16, en parte pola retirada do concurso das fábricas da Grela e San Balandrán.

Á redución do número de bloques engádese a caída dos prezos dos produtos. Se na subasta de decembro de 2018 o custo medio dos paquetes de 40 MW foi de 105.429 euros por MW e ano, na poxa pechada este mércores o promedio foi de 96.925 euros/MW e ano.

“MALAS” CONDICIÓNS DE PARTIDA

As condicións de partida poxa, con prezos de saída baixos -150.000 euros para os paquetes de 40 MW- e menos bloques, non beneficiaban ao complexo de San Cibrao, especialmente á fábrica de aluminio, altamente dependente da enerxía eléctrica -segundo a multinacional, a electricidade supón o 40% dos seus custos de produción-.

“Fomos á subasta polo maior número de bloques posible pero acadamos un menos ca na anterior poxa”, confirman fontes da empresa, que sinalan que dado o menor prezo do MW por ano “temos un valor significativamente inferior ao do concurso para o primeiro semestre deste ano”.

Daquela, segundo a información de Cinco Días, Alcoa obtivo un incentivo eléctrico de 21 millóns polos dez bloques acadados.

A CONTÍA DESTINADA CAEU NUN 40%

A interrompibilidade trátase dun sistema de subastas que permite que as empresas que máis electricidade consomen reciban unha retribución a cambio da súa dispoñibilidade para desconectarse da rede en casos de emerxencia para o subministro. Nesta poxa participaron 123 compañías.

Os 340 bloques de cinco MW vendéronse a un prezo medio de 75.307 euros/MW ano. Así, o importe destinado á interrumpibilidade caeu nos últimos anos.

Sumando os 101,15 millóns subastados para o primeiro semestre do ano, a contía no 2019 ascende a un total de 196,15 millóns, a cifra máis baixa desde o inicio do sistema de poxas, no 2013. No 2018 foi de 316 millóns, un 40% máis.

“O GOBERNO TEN QUE ATALLAR ESTA SITUACIÓN”

As mesmas fontes sinalan que Alcoa “analizará os resultados e o impacto nas operacións”. Segundo a multinacional, o resultado da poxa reforza a súa demanda de medidas para rebaixar o prezo da luz a fin de que a industria do aluminio primario, cuxa única fábrica española é a de San Cibrao, sexa “viable”.

“O Goberno central ten que atallar esta situación”, salienta a multinacional, que insiste en que a electricidade “custa un 50% máis” á fábrica de Cervo “cás doutros países competidores“.

“SEN NOVAS” DO ESTATUTO E AS COMPENSACIÓNS POR CO2

Alcoa lembra que “non hai novidades” sobre o estatuto do consumidor electrointensivo, comprometido polo Executivo socialista desde o pasado ano. O documento viría a satisfacer a reclamación por parte das empresas que consomen alta cantidade de electricidade de compensacións para aliviar a tarifa da luz.

Outra das demandas da multinacional é que se tramite o aumento da contía -de 91 a 200 millóns de euros- das compensacións polas emisións indirectas de gases de efecto invernadoiro (CO2), un incremento tamén anunciado polo Ministerio de Industria. Segundo Alcoa, a actual cuantía “é claramente insuficiente para a industria electrointensiva”.

O COMITÉ: “O CUSTO DA ENERXÍA SERÁ MAIOR”

“O resultado da poxa de interrompibilidade foi peor que o anterior e a previsión do custo da enerxía para o segundo semestre do 2019 é peor que a do primeiro”, resume o presidente do comité de empresa de Alcoa San Cibrao, Xosé Paleo (CIG).

O sindicalista afirma que ten “os motivos claros”. O comité atribúe “ao recorte do orzamento” destinado á interrompibilidade e á “dependencia” do sector do aluminio da electricidade, que “nos fai asistir á poxa en inferioridade de condicións“, explica.

“SOMOS QUEN MÁIS NECESITA PREMER O BOTÓN”

“Estaba claro que, con menos bloques, quen ía quedar sen un seriamos nós”, razoa Paleo. “Somos quen máis necesidade temos de premer o botón e non podemos tirar os prezos”, sinala.

Así, os traballadores reclaman a aprobación do estatuto do consumidor electrointensivo, que equipare o gasto en electricidade “ao de países como Francia ou Alemaña. O Goberno está a facer as cousas ao revés; se se retrasa o aprobar o documento, polo menos debería garantir unhas condicións da subasta da interrompibilidade mellores ou polo menos iguais”, expón Paleo.

Así, o presidente do comité de empresa teme “afogar na beira” e que a multinacional tome algunha medida contra o emprego antes de que se aprobe o estatuto. “É urxente e imprescindible, se o goberno quere garantir os traballos”, afirma, para lembrar ao Executivo que o documento debe recoller “as obrigas das empresas” no tocante aos investimentos e aos postos de traballo.

ELECCIÓNS SINDICAIS

Os traballadores do complexo industrial de San Cibrao están chamados a elixir o novo comité entre os días 14 e 18 de outubro.

A sección sindical de Comisións Obreiras (CC OO) decidiu abrir un período até agosto para que os afiliados e simpatizantes que desexen formar parte das listas electorais se inscriban. Poden facelo no local sindical, a través do teléfono da sección (extensión 1493) ou do correo electrónico ccoosanciprian@gmail.com.

RESPOSTAR

Please enter your comment!
Please enter your name here