O Concello de Ribadeo comunicou este venres a apertura ao baño dos areais dos Bloques e O Cargadeiro, nos que recomendaba non bañarse tras a vertedura de xurro dunha gandeiría de Guiar que afectou ao Eo.
O concelleiro de Medio Ambiente, Jorge Díaz, explicou que “as augas da ría son aptas para o baño” tras coñecer o resultado das analíticas realizadas pola Consellería de Sanidade nos dous areais.
TODOS OS AREAIS RIBADENSES, CO VISTO E PRACE
Segundo expuxo a Xunta de Galicia, o Goberno galego encargou “para máis seguridade e tranquilidade” mostraxes no resto dos areais do municipio, e os resultados avalan a calidade da auga na totalidade das praias, que son na súa integridade aptas para o baño.
SEN MORTALDADE DE FORA E FAUNA
Nos espazos galegos non se apreciou tampouco mortaldade de flora e fauna, nin afección á produción marisqueira.
Este xoves, a Confederación Hidrográfica do Cantábrico facía públicos os primeiros resultados das mostras tomadas nos ríos Ouria e Eo, segundo as cales a contaminación producida pola vertedura diminúe río abaixo e na ría de Abres a auga cumpre cos valores de referencia.
Pola súa banda, o Principado de Asturias reabría a zona de produción da ría de Ribadeo para todas as especies despois de decretar un peche cautelar.
SEGUE A INVESTIGACIÓN DO SEPRONA
O Servizo de Protección da Natureza (Seprona), que cuantificou en 580.000 os litros saídos da balsa, segue a investigar as circunstancias en que se produciu a vertedura para determinar se o sucedido constitúe un delito contra o medio ambiente ou se salda cunha sanción administrativa.
