O número de casos activos de coronavirus na provincia de Lugo aumenta a 1.798, 67 máis ca onte. Nas últimas 24 horas confirmáronse 91 positivos novos por PCR.
Dos 1.798 casos, 72 permanecían ingresados a última hora da tarde de onte. O Hospital da Mariña atendía 20 pacientes con Covid-19, entre eles un na Uci; o HULA coidaba de 43 doentes positivos, entre eles 14 que requiren de coidados intensivos; o centro hospitalario de Monforte tiña oito contaxiados. Son datos que o Sergas vén de actualizar conforme á evolución nas últimas horas.
No histórico da provincia documéntanse 162 defuncións, 7.501 altas e 9.469 contaxios acumulados desde o inicio da pandemia. Fixéronse 151.191 PCR, o que implica que nas últimas 24 horas efectuáronse 1.177 probas.
No tocante á situación epidemiolóxica por municipios, continúa a mellora sostida en Viveiro, que documenta 213 casos nos últimos 14 días (15 menos ca onte e 54 menos que o pasado día 19). Neste concello aplícanse as máis altas restricións de Galicia. En Xove documentáronse 77 contaxios nese mesmo período (sen variacións).
No Vicedo localizáronse 35 positivos (+9) nas últimas dúas semanas, por 22 en Cervo (+4) e 51 en Burela (-1). En Foz contabilizáronse doce contaxios nese mesmo prazo (sen variacións), por 24 en Ribadeo (+2) e 14 en Riotorto (+1).