O mantemento do Ceip Virxe do Carme continúa a enfrontar as forzas políticas de Burela. O tenente de alcalde e edil de obras, o socialista Ramiro Fernández, defendeu este mércores a actuación do goberno local no tocante ao colexio tralas críticas realizadas polo PP.

Os populares aseguran que “non existe memoria” das actuacións levadas a cabo polo Concello neste ámbito, e cuestionan as cifras achegadas polo alcalde, o socialista Alfredo Llano, que afirmou que o goberno local gastara “máis de 23.000 euros”-os cartos que investirá a Xunta de Galicia nunha intervención- na conservación do centro.

O PP burelés afirma que o gasto realizado polo goberno no mantemento do Ceip Virxe do Carme durante os anos 2017 e 2018 foi de “12.219 euros”.

O edil de obras reitera os datos expostos polo rexedor e afirma que o investimento “só en material e obras subcontratadas a outras empresas supera os 10.000 euros”.

RECAMBIOS

Dentro deste apartado, segundo explica o concelleiro, realizáronse cambios de portas afectadas pola humidade e a carcoma, a impermeabilización de terrazas que metían auga nas aulas ou a substitución de ventás por outras novas de aluminio debido ás filtracións que permitían os anteriores marcos de madeira.

Ademais, segundo expón Fernández, o Concello financiou a substitución da instalación eléctrica no ximnasio polo risco que supoñían a luminarias existentes, xa que estaban a piques de caer, a eliminación dos canlóns interiores existentes, que estaban rotos, ou o cambio de persianas tras 50 anos de uso.

MAN DE OBRA

Fernández engade que “a isto temos que sumar a man de obra, as tarefas realizadas por persoal do Concello, que de non ser por elas estariamos a falar dalgo máis grave”.

O edil de obras afirma que “dende o 1 de agosto ata o 9 de novembro sumáronse máis de 900 horas de traballo que houbo que pagar. Calquera pai pode dicir o tempo que traballaron”, conclúe o concelleiro.

CIUDADANOS

O voceiro de Ciudadanos na Mariña, Manuel Vicente, asegurou que a solución ao deterioro do centro “chega tarde e só trala insistente demanda veciñal” e tilda de “acción orquestrada con visos electoralistas” o anuncio da Xunta de que acometerá en verán unha reforma integral do centro.

Vicente tamén criticou ao alcalde, ao que instou a “facer funcionar a institución municipal” para que non se permitan “irresponsabilidades compartidas”.

REPARACIÓN

A Consellería de Educación procede estes días ao cambio de canlóns e baixantes para evitar humidades no centro.

Tamén se cambiarán mobles e se levará a cabo unha desinfección para erradicar a presenza da scleroderma doméstica.