O Concello publicou na rede o primeiro dos vídeos do proxecto Xove Emprende en Galego.
A campaña, gravada polo cineasta xovense Xacio Baño, ten como obxectivo estimular o uso do idioma entre os negocios do comercio local e fomentar que se atenda á clientela en galego como práctica habitual.
TESTEMUÑA
Na primeira das pezas audiovisuais, o fundador de EMarela Fabián Ben, xestor de redes sociais, indica que “cando expuxen o meu proxecto empresarial dixéronme que o feito de facer a presentación en galego lle restaba credibilidade”.
“Un comercio local que ten 20 clientes de fóra no mes de agosto e o resto do ano xente da casa á que se atende en galego, se decide expresarse na internet en español dá unha imaxe falseada do seu negocio, e iso nótase”, explica.
