Centos de persoas manifestáronse este sábado en Xunqueira para esixir a limpeza do treito alto do río Fontecova, que en novembro de 2018 rebordou anegando ducias de vivendas e provocando a morte dunha veciña, Amparo Berdeal, e para esixir que se acometan obras para devolver o barrio á normalidade.
A marcha partiu do Santo Cristo, xunto á ponte medieval, para seguir polo Camiño Real ata a estrada. A protesta rematou diante da casa da veciña falecida, onde se leu un comunicado.
Representantes de todas as forzas políticas da corporación –PSdeG-PSOE, PP, Por Viveiro, BNG e Son Viveiro– participaron na manifestación.
A veciñanza de Xunqueira asegura que se sinte “abandonada” polas administracións e reclama medidas. Pancartas con lemas como “queremos vivir no barrio” ou “pedimos máis sentido común”, ademais de cánticos como “o río cocho mata”, deixaron claro o sentir dos veciños, que advirten que de non eliminar os obstáculos do treito alto do río, dada a pendente do Fontecova, podería darse unha nova riada.
Por outra banda, Augas de Galicia presentou o pasado xoves un proxecto no que incorpora demandas da veciñanza para a reconstrución do barrio, ensanchando o río na zona urbana a cambio de habilitar espazos para os vehículos de emerxencias. O Concello deberá dar luz verde ao plan, que requerirá dun investimento de arredor de 500.000 euros.
