O alcalde de Burela, Alfredo Llano, anunciou este mércores que mañá, xoves, solicitará ao conselleiro de Sanidade, Julio García Comesaña, que levante o confinamento perimetral no municipio, que se mantén desde o pasado día 6 de novembro, cando o concello burelao e mailo de Viveiro, entre outros 60 termos municipais galegos, foron pechados pola Xunta de Galicia a fin de atallar a propagación do coronavirus.
García Comesaña manterá unha xuntanza telemática cos rexedores e alcaldesas dos cinco municipios lucenses nos que se están a aplicar esa restrición, tamén o peche da hostalería.
“Imos tratar como se pode ver o caso concreto de Burela no aspecto da mobilidade, por que nos parece que xa se deberan permitir as saídas e entradas. Vemos que a única maneira de que isto funcionase ben é cun confinamento individualizado, cada un nas súas casas, porque agora hai unha permeabilidade absoluta, aquí están saíndo e entrando máis de 1.000 persoas diarias e evidentemente non ten un resultado; dado que non hai unha situación máis preocupante, pedimos que se permita”, afirmou o rexedor.
Por outra banda, no tocante á hostalería, Llano expuxo que solicitará ao conselleiro “ver como podemos combinar ben a seguridade sanitaria coa actividade socioeconómica. Imos procurar ver como podemos artellar medidas para, utilizando a imaxinación, buscar solucións que permitan este equilibrio. Imos tratar de enfocar ben o tema para entre todos lograr resultados positivos”, pediu.
“BOTABAMOS EN FALTA UNHA REUNIÓN”, ASEGURA O ALCALDE BURELAO
Respecto da situación epidemiolóxica, o rexedor explicou que, malia atoparse o municipio de novo en alerta vermella, “isto débese a unha soa causa, a chegada dun barco que viña con 17 persoas afectadas. Este número importante fai que volvamos a este nivel. Dado que están confinados no porto, queremos ver se computan ou non para o dato xeral de Burela, porque estariamos de non darse esta circunstancia en aviso amarelo“, matizou.
Sobre a xuntanza, Llano indicou que “xa a botabamos en falta porque en xullo, cando tíñamos aquela cantidade de contaxiados na Mariña e concretamente en Burela, mantiñamos todos os días unha videoconferencia onde tratábamos en conxunto os temas e éramos informados polas autoridades sanitarias, as locais e do propio Hospital. Penso que traballamos ben en conxunto e deu un resultado excelente”, xulgou.
VIVEIRO NON REXISTROU CASOS NOVOS EN 48 HORAS
En Viveiro, o Concello informou de que o municipio ten a día de hoxe 42 casos activos de coronavirus no municipio, segundo os datos da xerencia da área sanitaria.
Ademáis, o concello está nun nivel de alerta epidemiolóxica 1 (amarelo), é dicir, entre 7 e 14 casos novos positivos de coronavirus confirmados por PCR nos últimos sete días, e ningún nas últimas 48 horas.
“A evolución dos últimos días é boa, estabilizando a situación e baixando os casos no concello sen detectarse novos gromos, como consecuencia sen dúbida do bo comportamento da veciñanza, respectando as medidas e restricións postas en marcha”, valorou a alcaldesa, María Loureiro.
O concello lembra aos seus veciños que ten “un servizo activo, prestado por Protección Civil e seguindo un protocolo establecido, para axudar a aquelas familias afectadas pola Covid cando ningún dos seus membros pode saír á rúa, para poder depositar ás bolsas de lixo nos colectores ou cubrir as necesidades urxentes, como pode ser alimentación ou medicinas“.
