A organización do Resurrection Fest deu a coñecer este martes novas bandas que actuarán na edición de 2019 do festival, entre os días 3 e 6 de xullo. O carismático King Diamond será o cabeza de cartel da xornada do sábado.
O cantante danés, considerado un dos mellores vocalistas do heavy metal, chegará a Viveiro cun espectáculo de produción completa.
A banda de punk The Adicts, que regresa ao ‘Resu‘ tralo seu concerto de 2011, o trash de Municipal Waste, Bury Tomorrow, Toundra, os portugueses Devil In Me e os franceses Kause 4 Konflikt estarán na décimo cuarta edición do festival.
ENTRADAS
Tras esgotar os abonos de tres e catro días, os promotores do Resurrection Fest porán o venres á venta as entradas para cada xornada, a un prezo de 75 euros máis gastos para xoves e sábado, de 85 máis gastos para o venres, e de 12 máis gastos para a festa de presentación do mércores.
Os interesados poderán adquirir os pases para o recinto do campo de fútbol de Celeiro desde as 12.00 horas.
O VENRES, O PRATO FORTE
Neste senso, o Resurrection Fest anunciou o cartel do festival por días. O xoves será a quenda de Slayer, Gojira ou Parkway Drive, mentres que o prato forte da edición de 2019, Slipknot, protagonizará a xornada do venres, xunto a Arch Enemy e Trivium.
King Diamond, Lamb of God e Within Temptation serán os reclamos do último día do Resu, o sábado.
