Repasamos a axenda de ocio dunha fin de semana protagonizada polas San Lucas, que ofrece tamén teatro, deporte ou actividades infantís.
BARREIROS
Os colectivos Adega e Ollomao impulsan na mañá do sábado unha limpeza da praia de Arealonga, no concello de Barreiros.
BURELA
Quico Cavadal presentará o venres na casa da cultura de Burela o seu espectáculo ‘Os Inocentes‘, baseado na Guerra Civil. O espectáculo comezará ás 21.00 horas.
O sábado, novo envite na casa para o líder da Liga Foro 16 Feminismo. Será un duelo de contrastes: Pescados Rubén Burela FSF, que comanda a táboa, medirase ao Guadalcacín, pechacancelas.
CERVO
O sábado, a partir das 12.00 horas na casa da cultura de San Cibrao, haberá un obradoiro para nenos, que poderán crear o seu propio superheroe ou superheroína.
O domingo, desde as 12.00 horas na biblioteca de Cervo, noutro taller pensado para crianzas, ensinarase a construír unha máquina de facer debuxos animados.
FOZ
O venres, a partir das 18.30 na casa da cultura, celebrarase o espectáculo musical infantil ‘Contos para un mundo mellor‘, a cargo de Gloria Mamá Cabra e Diego Maceiras.
O sábado, desde as 18.00 horas na escola de Fazouro, Xesús do Breogán proxectará fotos do seu arquivo: ‘Foz, onte e hoxe‘.
Ese mesmo día, ás 19.30 horas na casa da cultura, Sarabela Teatro recreará a obra ‘Normas para saber vivir na sociedade moderna‘. A peza humorística esconde unha crítica á falta de sinceridade. O prezo da entrada é de 3,5 euros, dous para estudantes e xubilados.
MONDOÑEDO
Continúa o programa das feiras máis antigas de Galicia. As San Lucas ofrecen un programa variado, con verbenas, concertos, monólogos, mostras folclóricas ou o habitual mercado -ao que se engaden postos de produtos ecolóxicos.
Os concertos de Carlos Núñez o domingo na catedral -coas entradas esgotadas- e do grupo de bachatas Extra, o sábado, son algúns dos atractivos do cartel, do programa, así como as mellores orquestras: París de Noia e Principal (venres), La Favorita e Israel (sábado) e Palladium (domingo).
RIBADEO
Os especialistas en comida xaponesa Álex Seoane e Antonio Reboredo ofrecerán un showcooking dentro das xornadas do sushi programadas polo Náutico Bar. Celebraranse o sábado e o domingo, cun menú especial a 25 euros. Reservan no teléfono 679.473.740.
O sábado, Chemi Lombadero presentará o libro ‘O Comercio marítimo da ría de Ribadeo nos séculos XVI e XVII‘. Será na Casa das Letras, desde as 20.00 horas.
VIVEIRO
Ollomao Teatro representará ‘Enciclopedia Álvarez‘, peza sobre a educación durante o franquismo, o sábado, ás 20.30 horas, no teatro Pastor Díaz.
DÍA DO CANCRO DE MAMA
A Mariña encherase esta fin de semana de actos con motivo do Día Mundial polo Cancro de Mama. Podes coñecer as actividades previstas neste enlace.
