O comité de empresa de San Cibrao anunciou este venres a través dun comunicado de prensa que Alcoa aceptou a petición dos representantes dos traballadores de respectar os contratos dos eventuais -obreiros de Empresas de Traballo Temporal- que están a cubrir as vacacións do persoal da planta de aluminio.

A multinacional puxera en cuestión estes contratos ao sinalar que a rebaixa produtiva que pretende aplicar –coa parada de 32 das 512 cubas da serie de electrolise e cunha redución da produción do 11,25%- suporía “revisar” a relación laboral acordada con estes empregados, adiantando a súa finalización.

Do mesmo xeito, a dirección, expoñen os sindicatos, “informou que seguirá contando co persoal que superou os sete meses cunha avaliación positiva para cubrir as vacantes que se vaian xerando tal e como ten acordado co comité. Tamén comentou”, proseguen, “que continuará a cubrir as necesidades temporais na mesma liña que viña facendo ate o momento”.

O COMITÉ PEDIRÁ “UN COMPROMISO” DA ALUMINEIRA

Os traballadores seguen á espera dunha data concreta para reunirse co director de Alcoa na planta de Cervo e en España, Rubén Bartolomé. Nesta xuntanza pedirán compromisos a Alcoa da continuidade da produción de aluminio en San Cibrao “ademais de que renuncie a súa decisión de parar as 32 cubas”.