As condicións da poxa de interrompibilidade, que publicou este martes o Ministerio para a Transición Ecolóxica no Boletín Oficial do Estado (BOE), poñen “en serio risco” a supervivencia da planta de Alcoa en San Cibrao, no municipio de Cervo, e “o sistema enerxético español vai ter problemas”, advirte o comité de empresa do complexo industrial sancibrense.

Así o alertou o presidente do comité de empresa da multinacional estadounidense do aluminio, José Antonio Zan, que chamou a todos os “actores e sectores” da Mariña Lucense á mobilización convocada este mércores en Foz, a partir das 20.00 horas, e a outras protestas que se van a programar por parte do comité de empresa, ante unhas condicións que ve “como as peores posibles“.

“Coa publicación da poxa de interrompibilidade metéronlle un recorte moi severo, por non dicir que fixeron desaparecer esta poxa. Agora mesmo a xente tense que mobilizar. Non podemos ter por parte do goberno medidas tan duras contra as empresas electrointensivas e necesitamos que se poña un marco xurídico que estableza o prezo da enerxía“, sinalou.

SEN PAQUETES DE 40 MW, OBXECTIVO PRIORITARIO DE ALCOA

Zan concretou que este martes no BOE “sae publicada a poxa de interrompibilidade na cal eliminaron os lotes de 40 MW -os principais obxectivos de Alcoa- e pasaron a paquetes de cinco, que tamén están a sufrir recortes no prezo”.

Isto “leva”, precisou, que “de 2.400 MW que había de interrompibilidade”, agora báixase a mil, “o que é un perigo para as electrointensivas porque ao final este servizo de interrompibilidade que dabamos non vai ser rendible para estas empresas“, abundou.

ALUMINIO, MOI DEPENDENTE DA LUZ

“A competencia na subasta vai ser terrible“, prognostica o sindicalista, facendo fincapé en que as empresas máis dependentes da electricidade, como é Alcoa –a luz supón o 40% dos custos de produción da planta de aluminio– son as principais prexudicadas das condicións da poxa.

Á ESPERA DE NOVAS DO GOBERNO SOBRE O ESTATUTO

“Entendo que este é o paso previo á eliminación da subasta“, expón Zan, que critica que o Executivo central acometa esta rebaixa nas condicións “cando aínda non temos sobre a mesa un novo marco tarifario para electricidade, cun prezo do MW de arredor de 35 euros, similar ao de Francia e Alemania“.

O sindicalista afirmou que o comité aínda non tivo comunicación por parte da empresa respecto do balance da subasta de interrompibilidade, pero admite que “se a postura de Alcoa antes era alarmante, vai ser peor agora“.

Por outra banda, os sindicatos seguen á espera dunha comunicación por parte do Ministerio de Industria, dado que se comprometeu tanto á creación dunha mesa de seguimento polo futuro da planta como a amosar o borrador de estatuto das empresas electrointensivas, sen que os traballadores tiveran por agora novas do Goberno central.

Tanto Zan como o seu antecesor na presidencia, Xosé Paleo, tentaron infrutuosamente porse en contacto con “a ligazón” que teñen en industria sen que finalmente se concretara nada sobre esa nova reunión e hai dous meses da presenza de Maroto na planta mariñá.

MOBILIZACIÓN EN LUGO

Por iso, non descarta, ante a ausencia de respostas por parte do Goberno, levar as protestas á cidade de Lugo. “Seguramente haberá unha gran mobilización (en Lugo), para reclamar ao Goberno que abra os ollos e nos atenda”, avanzou.

Esta “gran” manifestación convocaríase antes de fin de ano, “pronto”, apuntou Zan, “vendo que o sistema de interrompibilidade que era parte dese mecanismo que se usaba para baixar o prezo da enerxía pasa case a quedar eliminado”.

“Temos que saber como teñen pensado paliar este problema (de rebaixa no prezo da luz que leva un 40 por cento da facturación de Alcoa) para pór un prezo igual que Francia ou Alemaña”, concluíu.

CONTEXTO CONVULSO

A rebaixa das condicións na poxa de interrompibilidade prodúcese nun contexto no que Alcoa ameaza con pechar a planta de aluminio primario de San Cibrao sen un abaratamento da enerxía eléctrica. A multinacional anunciou un plan de axuste a nivel mundial, cun prazo de cinco anos, no que estudará o peche de fábricas e unha redución da produción noutros emprazamentos.

CIG E PLATAFORMA APOIAN A PROTESTA DE FOZ

Tanto a CIG como a Plataforma na Defensa da Sanidade Pública da Mariña emitiron comunicados nos que mostran o seu apoio á concentración convocada polos traballadores (Praza Conde de Fontao de Foz, 20.00 horas). Tanto o sindicato nacionalista como o colectivo inciden na necesidade de “concienciar” á poboación da comarca de que a situación de Alcoa “é un problema de todos”.