O Ministerio de Industria, a Xunta de Galicia e os sindicatos CC OO, UGT e CIG emitiron un comunicado conxunto despois da celebración da xuntanza deste mércores, na que o Goberno central convocou ás partes implicadas para tentar acadar unha solución ao Expediente de Regulación de Emprego (ERE) presentado por Alcoa na planta de aluminio de San Cibrao, unha videoconferencia á que a titular do complexo industrial non se presentou.
“De forma conxunta”, Administracións e centrais sindicais explicitan o seu “apoio” ao comité de empresa e o seu “compromiso” de seguir traballando “desde a unidade” para “acadar” que o proceso de compra-venda da planta de Alcoa San Cibrao “teña as certezas necesarias para que a mencionada operación sexa efectiva”.
“Todas as partes entenden que esta é a mellor maneira de garantir tanto o mantemento da actividade industrial como dos postos de traballo na comarca da Mariña“, finaliza a nota.
O comunicado semella descartar unha intervención da planta que os traballadores reclamaban ao Executivo estatal para frear a intención de Alcoa de parar as cubas de electrólise e garantir un proceso de venda a un comprador produtivo, como Liberty House/GFG Alliance. Tampouco se menciona unha posible impugnación do proceso, coa que ameazou o Goberno autonómico.
Así, os sindicatos e Alcoa retomarán mañá en Lugo o período de consultas do despedimento colectivo, que suporía máis de 900 despedimentos entre traballadores da planta e de empresas auxiliares. Os delegados sindicais pediran un receso dun día para avaliar a acta de desacordo presentada pola empresa, o que permitiu dar pé a unha nova xuntanza entre todas as partes, finalmente frustrada pola propietaria. Deste xeito, afrontarán as horas finais do prazo con escasa marxe de manobra.
