Ramón González Rey/EFE. Decenas de traballadores da factoría de Alcoa en San Cibrao, Cervo, vestidos coa súa roupa e cascos de traballo, cortaron esta mañá, sobre as 10.30 horas, a Autovía do Cantábrico (A-8) ao seu paso polo municipio lucense de Ribadeo, para reclamar unha solución que permita manter o cento por cento da produción e do persoal na fábrica de aluminio primario.
Os traballadores ocuparon a autovía e cortaron o paso de vehículos con barricadas de pneumáticos ás que logo lles prenderon lume, ao berro de “A Mariña sálvase loitando“. A estrada está cortada desde o quilómetro 508 ao 505,5, en ambos sentidos da circulación.
Na concentración escoitáronse consignas xa coñecidas nas mobilizacións dos traballadores de Alcoa, que comezaron cando a multinacional anunciou un expediente de regulación de emprego (ERE) que podería afectar a máis de medio milleiro de traballadores da planta e a outros 400 de empresas auxiliares, segundo estiman os sindicatos, e significar na práctica o apagado das cubas de electrólise, “o corazón” do complexo industrial sancibrense.
O comité de empresa da factoría xa expresou públicamente o seu apoio ao proceso de venda a GFG Alliance / Liberty House, pero lamenta que Alcoa estea “actuando de mala fe” para “boicotealo” ao entender que non está interesada no traspaso.
Segundo o acordo entre Alcoa e os sindicatos, a data límite para un preacordo de venda é o 27 de setembro, inclusive. De non concretarse un pacto, a patroal e a parte social retomarían o 28 o período de consultas do despedimento colectivo.
“NON IMOS PARAR ATA TER UN ACORDO POR ESCRITO”, ASEGURA O COMITÉ
O presidente do comité de empresa, José Antonio Zan, dixo que esta manifestación foi convocada para que “todas as negociacións que está habendo” para a venda da planta mariñana “fructifiquen dunha vez“.
“Non podemos ter a toda unha provincia en pé de guerra, pendente de que haxa un acordo, e máis cando a produción de aluminio primario é necesaria para España“, dixo Zan, quen tamén recordou que en pleno confinamiento a actividade produtiva en Alcoa foi declarada “esencial, o 30 de marzo”.
“Seguimos sendo esenciais. Non se pode permitir que unha multinacional poña en perigo a toda a industria. Temos que ter unha solución a longo prazo. Ten que haber un acordo canto antes entre Liberty e Alcoa”, engadiu.
Zan recoñeceu, de acordo coa información que manexa o comité de empresa, que as negociacións están “avanzando”, pero que ata que non haxa acordos “por escrito“, é “igual que non ter nada”.
RECLAMA ÁS ADMINISTRACIÓNS QUE “GARANTAN” UN PACTO
Dixo, ademais, que nas conversacións entre Liberty e Alcoa o comité “non se vai meter”, pero si esixirlles ao Goberno de España e ao da Xunta de Galicia que garantan “que esas negociacións cheguen a bo porto”.
“Non imos parar de meter presión ata que teñamos por escrito unha solución”, aclarou o presidente do comité.
Asegurou, na mesma liña, que o comité ten “moi claro” que si a presión social continúa “o ERE non se vai executar, senón que se vai a conseguir a continuidade da planta e a produción de aluminio primario e de transformación neste país. Necesitamos ese aluminio para poder competir”, concluíu.
PARTICIPACIÓN DE OBREIROS DE ALACANTE E AMOREBIETA
Á protesta acudiron traballadores das fábricas da segunda transformación de aluminio, de Alacante e Amorebieta, que se nutren da fábrica de San Cibrao.
