EFE. O vicepresidente primeiro da Xunta de Galicia, Alfonso Rueda, referiuse este luns ao peche da planta de aluminio de Alcoa, asegurando que a solución pasa “por facer que a multinacional, que está tendo un comportamento irresponsable e desleal, entre en razón”.
Nunha entrevista para a Cadena Ser, Rueda afirmou que o Goberno autonómico vai tentar “con todos os medios” que haxa unha solución ao conflito laboral na fábrica de aluminio de San Cibrao, onde a multinacional presentou un Expediente de Regulación de Emprego (ERE) que suporía o despedimento de máis de 900 obreiros entre a factoría e a industria auxiliar.
O vicepresidente primeiro da Xunta non descartou a vía xudicial, pero preguntado sobre a posibilidade dunha intervención pública da planta, que reclaman os traballadores, espera que se poida lograr unha solución antes e sen “medidas tan drásticas”, que sería “mellor para todos”. “Non se trata de derrotar a Alcoa, pero si que teñen que saber que nos van a atopar en fronte”, aseverou.
CABALLERO ANIMA A CONTEMPLAR “TODAS AS VÍAS DE INTERVENCIÓN POSIBLES”
Por outra banda, o secretario xeral do PSdeG, Gonzalo Caballero, asegurou o pasado domingo que é necesario “contemplar todas as vías de intervención posibles” para evitar o peche da planta de Alcoa na Mariña.
Nunha entrevista a Radio Nacional de España, o socialista defendeu que “hai que dicirlle a Alcoa que non se pode pechar unha planta que é viable e para a cal hai un investidor, simplemente para eliminar un competidor no mercado”. Este é, ao seu entender, “o argumento que cremos que ten moito peso nestes momentos”. “É unha empresa estratéxica, e se o Ministerio de Industria e o Goberno de España contemplan a posibilidade de que a Sepi poida incorporar a Alcoa para poder cedela logo a Liberty House, hai que tomar todas as decisións posibles para manter esa actividade e, desde logo, hai que barallar e aplicar esa intervención que evite a pechadura da planta”, sinalou.
O ATLETA ROBERTO SOTOMAYOR, COS TRABALLADORES
Os traballadores de Alcoa levan un longo percorrido pola continuidade dos empregos e da produción. Esta fin de semana recibiron o apoio de todo un tricampión de Europa de atletismo e subcampión do mundo na categoría máster, Roberto Sotomayor.
Vosotros gritáis “Viva el Rey”.
Yo grito “viva los trabajadores de ALCOA”, y… VIVA LA LUCHA OBRERA.
— Roberto Sotomayor🔻🇪🇦🏳️🌈🇪🇺 (@SuperRoStar) October 11, 2020
