EFE. Case tres meses despois das riadas que asulagou Viveiro e a zona de Xunqueira, onde unha muller perdeu a vida, o Concello recoñece que necesitará a axuda de todas as administracións para recuperar as zonas públicas arrasadas pola auga e a lama, dado que os danos calcúlanse en máis de 300.000 euros.

En declaracións a EFE, a rexedora, a socialista María Loureiro, precisou que Concello tivo que facer fronte “a unha situación extraordinaria, unha auténtica desgraza”, que o pasado 28 de novembro ocasionou graves danos nos espazos públicos municipais, pero tamén en vivendas e negocios privados.

OBRAS PENDENTES

Nestes intres, precisou a alcaldesa, o Concello xa gastou arredor de 70.000 euros do orzamento municipal para tentar de devolver á cidade unha sensación de normalidade, pero aínda quedan obras pendentes, “moi custosas”, que haberá que acometer “con certa urxencia”, como rehabilitar “un dos muros do cemiterio municipal, que está nunha situación lamentable”.

“Non temos a capacidade para ocuparnos de todo”, dixo Loureiro, polo que espera a implicación de administracións como a Deputación Provincial de Lugo e a Xunta de Galicia.

Tamén do Goberno central, porque lembrou que os técnicos municipais, na medida das súas posibilidades, seguen a elaborar informes de danos e remitíndoos ao Executivo, a través da Subdelegación, para que teñan constancia das perdas ocasionadas pola riada.

Loureiro precisou que os afectados pola riada xa fixeron “as súas reclamacións“, ben a través dos seus seguros ou por vía administrativa, de xeito que algúns a cobraron a correspondente indemnización por parte da súa aseguradora.

INFORME HIDROGRÁFICO

O Concello de Viveiro espera un informe hidrográfico por parte de Augas de Galicia para actuar na “zona cero” da riada, en Xunqueira.

“Queremos ter unhas pautas sobre o que temos que facer e as zonas nas que hai que realizar determinadas intervencións”, explicou, porque “o Concello non pode acometer eses traballos sen dispoñer antes dese plan“.