A Xunta de Galicia anunciou o inicio das obras de reforzo do firme na estrada autonómica LU-161, que comunica o interior dos municipios de Viveiro, Ourol e O Valadouro, e nas que a administración autonómica investirá 450.300 euros.

O delegado territorial da Xunta en Lugo, José Manuel Balseiro, visitou a zona acompañado de concelleiros da agrupación local do Partido Popular (PP), así como do tenente de alcalde de Viveiro, o socialista Suso Fernández.

A Consellería de Infraestruturas e Mobilidade prevé que os traballos estean rematados, “se as condicións climatolóxicas o permiten”, na “segunda quincena de setembro“. Os traballos están a executarse actualmente na zona de Boimente.

As obras iniciáronse no punto quilométrico 2+680 na localidade viveirense de Chavín e proseguirán ata o 11+100, nas Lobeiras. Tamén hai traballos programados dende o 14+990 ata o 16+000 na parroquia de Vilacampa, no Valadouro.

ACTUACIÓNS

As actuacións de mellora do firme inclúen o fresado e reposición da capa de rodaxe naquelas zonas que presenten deterioro mediante mestura bituminosa a carril completo, con áridos de alta calidade para garantir unha mellor adherencia. Tamén a instalación, en varios puntos, de novas barreiras metálicas que contribúan a mellorar a seguridade e eviten saídas da vía.

Están previstas outras actuacións complementarias como son a limpeza de marxes e a mellora das beiravías, que nalgúns tramos serán de seguridade, isto é, practicables. Tamén a reposición da sinalización horizontal e o reforzo da sinalización vertical.

DEMANDADO DESDE HAI UNHA DÉCADA

A mellora desta estrada, que conecta A Mariña Occidental e A Mariña Central, é unha vella demanda, de arredor dunha década. O Bloque Nacionalista Galego (BNG) levou ao Parlamento galego as deficiencias da vía e os alcaldes socialistas do Valadouro, Edmundo Maseda, e Viveiro, María Loureiro, reclamaron de forma conxunta o seu arranxo.