A 863 edición das feiras e festas das San Lucas comezaron este xoves cunha instantánea icónica dos festexos, a baixada dos cabalos polas rúas da cidade ata a Praza da Catedral.
Centos de exemplares baixaron desde os montes da contorna á cidade episcopal, onde os asistentes poideron desfrutar da potencia dos animais e da beleza da coñecida como a catedral axeonllada nunha imaxe que cada ano inaugura os festexos. Os cabalos continuaron despois ata o campo feiral.
O pregón a cargo do valadourense Manuel Lourenzo, popular a nivel estatal pola serie ‘Fariña’ pero cunha dilatada traxectoria como actor e dramaturgo, ateigou o auditorio Pascual Veiga e foi outro dos momentos centrais da xornada, que rematará coa música de Panorama e Beatriz.
Fotos do pregón da Asociación San Lucas.
CONTINÚA O PROGRAMA
O programa continuará nos próximos días. O venres 18, o día da gran feira tradicional, celebrarase tamén o concurso de andadura e un espectáculo de doma nocturna. O sábado desenvolverase o concurso morfolóxico, a xuntanza de tractores clásicos e o Festival Intercéltico As San Lucas, ademais de proxectarse un videomapping na fachada da catedral.
O domingo pecharán As San Lucas o acto de entrega do Premio Mondoñedo10 2019 na modalidade Ensaio, en lembranza de Alicia Tella-Villamarín Ferreiro, o concurso de cabalos trotóns e un monólogo ao que hai que engadir “as tradicionais verbenas que se desenvolverán cada un dos días das festas na Alameda”.
