O número de positivos por coronavirus en residencias de maiores da Mariña Lucense continúa estable, segundo o reconto oficial da Xunta de Galicia.
Na residencia de Foz, onde se someteron ás probas para todos os empregados (30) e maiores (43), continúan activos cinco positivos de usuarios e sete de traballadores.
No xeriátrico Betania, en Viveiro, hai documentados tres positivos de usuarios. Unha relixiosa que contraera o coronavirus permanece en illamento, á espera do resultado da segunda proba. Segundo confirmou a alcaldesa, María Loureiro, entregáronse os resultados das probas á totalidade de usuarios (118), traballadores (38) e relixiosas sen documentarse máis casos.
En Mirador del Eo, vivenda comunitaria privada de Ribadeo, hai dous maiores afectados; unha muller recibiu a alta do Hospital Público da Mariña o pasado luns, e remata en illamento a cura do virus, ao igual que o outro residente positivo.
Finalmente, hai dúas traballadoras infectadas na residencia de Burela e un empregado no xeriátrico San Rafael de Mondoñedo, onde se agarda que se realicen nos próximos días tests a todos os usuarios e obreiros.