Un total de 126 maiores da residencia de Xove, ademais doutros 14 usuarios dos pisos tutelados San Bartolomeu, e medio centenar de traballadores destes servizos, sometéronse este venres ás PCR para confirmar se padecen o coronavirus, despois de que unha obreira do xeriátrico dese positivo por Covid-19 nos últimos días.

Catro traballadoras xa foran sometidas ás probas ao ter un maior contacto coa persoa contaxiada, sen que por agora trascendese o resultado. Estas obreiras permanecen en confinamento, igual que a infectada, residente en Viveiro. Na familia desta empregada detectáronse alomenos outros dous positivos, ademais doutros tres de parentes que visitaron a este núcleo familiar a mediados do mes de xullo desde Hospitalet de Llobregat.

A alcaldesa de Viveiro, María Loureiro, asegurou que se actuou “rápido” para illar á unidade familiar “e evitar unha transmisión comunitaria”.

Estes tres positivos residentes en Viveiro incluíronse -non así os casos dos residentes en Cataluña– no reconto do brote da Mariña ofrecido este venres polo Servizo Galego de Saúde (Sergas), que contabiliza 56 positivos, con oito novos casos, dentro do brote da Mariña. Con todo, a Consellería de Sanidade non confirma se hai algún tipo de relación entre estes tres novos contaxiados e os infectados a partir do foco localizado á altura do San Xoán. As autoridades locais de Viveiro e Xove afirmaron que se trata dun foco distinto, orixinado a partir dun caso importado, pois foron os familiares cataláns os que detectaron os síntomas e resultaron positivos, buscándose a partir deles os contactos en Galicia.

Os oito novos positivos na Mariña detectáronse en Viveiro (3), Foz (3) e Burela (dous).

USUARIOS E OBREIROS, “ASINTOMÁTICOS”

Desde a Fundación San Rosendo, que xestiona o centro de maiores, sinalan que tanto traballadores como usuarios están “asintomáticos”. Así, están “á espera de resultados” para “tomar decisións” no tocante á organización. O último cribado de PCR realizadas no xeriátrico xovense data do 25 de xuño e xustamente esta semana ían comezar as primeiras visitas, que quedan descartadas.

“Desde onte volvimos á fase 0, de confinamento total; as obreiras comezaron a traballar con FPP 2 e se hai algún positivo entre os usuarios illaráselle; estamos preparados para desdobrar a residencia e que determinado persoal traballe con casos de coronavirus, cos equipos de protección individual (EPI) e as medidas de prevención necesarias, e outro cos usuarios negativos”, concretan desde a Fundación San Rosendo.