O número de casos activos de coronavirus na provincia de Lugo ascende a 136, 23 máis ca onte, segundo o reconto ofrecido este mércores polo Servizo Galego de Saúde (Sergas).
Dos 136 casos activos, hai seis ingresados: dous na Unidade de Coidados Intensivos (Uci) do Hospital Universitario Lucus Augusti (HULA) e outros catro en planta, neste mesmo centro hospitalario. Non hai pacientes con Covid-19 en Burela, segundo o Sergas.
No histórico da provincia documéntanse desde o inicio da pandemia 29 falecementos, seis deles na Mariña, ademais da morte dunha sexta persoa que ingresara no Hospital da Costa por coronavirus e faleceu na unidade de críticos de Burela malia superar a enfermidade. Déronse 1.263 altas, cun total de casos acumulados de 1.428.
RESIDENCIAS
No tocante ás residencias, na Mariña documéntase un positivo, o dunha traballadora do xeriátrico San Bartolomeu de Xove, confirmado semanas atrás. Non houbo máis contaxios nin entre os usuarios nin entre o persoal deste centro de maiores.
Na provincia localizouse nas últimas horas un traballador infectado no Incio, que se une ao caso de Xove e a outro detectado en Paradela.
1.623 POSITIVOS EN GALICIA
A Dirección Xeral de Saúde Pública da Consellería de Sanidade informa que, na última actualización, o número de casos activos de coronavirus en Galicia é de 1.623, deles 960 son da área da Coruña, 136 da de Lugo, 145 da de Ourense, 84 da de Pontevedra, 138 da área de Vigo, 91 da de Santiago, e 69 da de Ferrol.
Do total de pacientes positivos, 5 están en Uci, 55 en unidades de hospitalización e 1.563 no domicilio. Polo de agora, en Galicia déronse un total de 11.657 altas, rexistrándose 625 falecementos. O número de PCR realizadas é de 286.968.
