A Mariña encheuse de actos reivindicativos este mércores con motivo do 25 de novembro, Día Internacional pola Eliminación da Violencia contra as mulleres.
A Praza Maior de Viveiro acolleu unha concentración silenciosa na que se leu o manifesto da campaña ‘En Negro contra as Violencias‘, que está a tinguir de loito os municipios galegos en repulsa contra o machismo.
RECORDO EN CERVO A MARÍA JOSÉ E ADELA, ASASINADAS NO 2014
María Loureiro, alcaldesa de Viveiro, fixo un chamamento “a concienciar e visibilizar esta lacra social da violencia de xénero, temos que estar preto das vítimas e axudalas, aumentando os recursos para rematar o antes posible esta loita”. O consistorio acollerá o venres unha nova reunión da Mesa Local de Coordinación Interinstitucional contra a Violencia de Xénero.
En Cervo gardouse un minuto de silencio tanto no consistorio, na capital municipal, como na casa da cultura, en San Cibrao, polas vítimas da violencia de xénero, “coma sempre co noso recordo especial para María José (Suárez) e Adela (Ramos)“, veciñas do municipio asasinadas no 2014.
En Burela, a Praza do Concello acolleu un dos actos enmarcados dentro do programa con motivo do 25-N. Alí desenvolveuse unha concentración e deuse lectura a un manifesto.
A concelleira de Muller e Igualdade, Noelia Ben, destacou que “só coa implicación do conxunto de toda a sociedade poderemos continuar o noso traballo, para que Burela sexa un lugar más amable para vivir, todos e todas, en igualdade”.
Durante toda a semana a fachada do Concello está iluminada de morado e tamén se colgou da fachada unha pancarta conmemorativa.
Barreiros, O Valadouro, A Pontenova ou Lourenzá -onde os tradicionais Cocos vestiron de negro- foron outros dos lugares que acolleron actos reivindicativos.
En Trabada, o Observatorio da Mariña pola Igualdade presentou o vídeo testemuñal ‘Elas Tamén Contan: voces de mulleres no rural‘, un traballo elaborado dentro da campaña de sensibilización sobre as violencias machistas no ámbito rural.
CAMPAÑA NAS REDES SOCIAIS
Os actos presenciais, coas medidas de precaución para evitar contaxios, espalláronse por toda a comarca, aínda que a campaña contra a violencia de xénero tivo e segue a ter especial protagonismo a través das redes sociais. Na web ennegrocontraasviolencias.gal pódese descargar todo o material. Os hashtag serán #EnNegroContraAsViolencias, #EnNegro2020, #GaliciaEnNegro, #QuerémonosVivas e #NonEstásSoa.
#25N 🟣👵🧓 Usuarias e usuarias do Centro de Atención a Maiores da @depulugo en #Ribadeo sumáronse aos actos de loita contra a violencia ás mulleres 👇 pic.twitter.com/oYaMZ1LTFE
— Deputación de Lugo (@depulugo) November 25, 2020
Usuarios e usuarias das catro residencias de maiores da Deputación tamén se sumaron aos actos polo 25N. Concretamente, gravaron vídeos recitando estrofas da obra ‘Poema á Muller Galega‘, de Manuel María. Con todo ese material, o Servizo de Audiovisuais da institución provincial elaborará unha peza para que os residentes dos centros de maiores de Trabada, A Fonsagrada, Pol e Ribadeo a teñan para o seu recordo.
Desde Mondoñedo lembraron así mesmo que unha das 41 mulleres que foron asasinadas en crimes machistas ao longo do presente ano “é unha veciña”, do concello limítrofe da Pastoriza, lembrando que a lacra do machismo está presente non só nos telexornais senón que tamén se padece ao pé da casa.
O Colectivo Meigas Bravas Son, que celebrou unha protesta esta tarde en Barreiros, tamén deixou na rede unha peza audiovisual, cunha letra adaptada da cantautora mexicana Vivir Quintana.
