Un home de 87 anos, procedente da residencia de San Cibrao, en Cervo, faleceu o pasado mércores no Hospital da Mariña, segundo concretaron fontes de Mensajeros de la Paz, concesionaria do servizo, de titularidade municipal. Fora diagnosticado de Covid-19 e trátase así da décimo segunda vítima mortal do brote localizado a finais do pasado mes de outubro no xeriátrico da Veiga. Faleceron 12 dos 54 usuarios cos que contaba o centro de maiores antes de que se detectara o abrocho, máis dunha quinta parte.
Unha muller de 92 anos e un home de 93, nos últimos días de novembro; un home de 93, o día 20 dese mes; unha centenaria, o 19; unha muller de 96 anos, o día 15; unha muller de 84 anos, o día 9; dúas mulleres, de 89 e 92 anos, os pasados días 6 e 7; outra anciá, de 91, o 3 deste mes; e unha dona de 89 anos e un home de 81, o pasado día 1, foron as anteriores vítimas mortais do abrocho.
NON QUEDAN RESIDENTES NO HOSPITAL; OITO MAIORES E DÚAS TRABALLADORAS TEÑEN COVID-19
O falecido era o único residente que permanecía hospitalizado, segundo concretan as mesmas fontes. Actualmente hai oito maiores positivos no centro, aínda que Mensajeros de la Paz espera que o número de casos baixe en diante, cando se reciban os resultados de PCR realizadas nas últimas horas. Entre o persoal hai dúas traballadoras infectadas.
POSITIVOS NOS XERIÁTRICOS DA PROVINCIA
MAIORES
17 Residencia San Salvador (Guntín)
66 Residencia Asilo Vilalba
TRABALLADORES
1 Residencia DomusVi Chantada
3 Residencia San Cibrao (Cervo)
7 Residencia San Salvador (Guntín)
1 Residencia A Veiga (Láncara)
1 Residencia Albertia Lugo
1 Residencia San Rafael (Mondoñedo)
21 Residencia Asilo de Vilalba
1 Residencia San Vicente de Paúl (Lugo) (discapacidade)
