O lobo mata unha xata e un poldro no Valadouro

O gandeiro, natural de Vilacampa, dá por perdidos "700 euros" ao atopar a becerra máis de 72 horas despois do ataque

Cadáver do poldro. AXM

O lobo volveuse facer notar na Mariña Lucense ao longo destes últimos días, nos que matou unha xata e máis un poldro dunha explotación extensiva de Vilacampa, no concello do Valadouro.

O propietario, Víctor Pena, explica que o poldro quedou ferido tralo ataque do cánido e morreu nos días sucesivos, mentres que da becerra ficou pouco máis que o esquelete, que o gandeiro atopou no monte catro días despois da súa morte.

Pena, que ostenta arredor de cen vacas ademais de cabalos e ovellas, expón que en marzo xa perdeu “varios poldros pequenos” a causa dos ataques do lobo. “Se non os recollemos de pequenos non queda nada”, indica.

DOCE RESES MORTAS CADA ANO

Así, calcula que a súa explotación perde a causa dos ataques arredor dunha ducia de reses anuais, sobre o dez por cento do total de cabezas de gando vacún, cabalar e ovino. A isto suma os abortos das vacas preñadas a causa do estrés que provocan os encontros co seu depredador. Tamén lembra que hai animais destinados á cría, “polo que perdes potencialmente anos de ter outros exemplares. Sempre houbo lobo”, asegura, “pero agora mesmo está a cousa descontrolada”, matiza.

O CONCELLO PEDIRA AOS GANDEIROS QUE DENUNCIEN

No pasado mes de xullo, o Concello do Valadouro instou aos gandeiros a denunciar á Consellería de Medio Ambiente os ataques a reses como única forma de acadar algunha compensación e para visibilizar a problemática.

Tralo bando do executivo municipal está a fartura de moitos gandeiros, algúns dos cales non contemplan as axudas comprometidas pola Xunta de Galicia como unha solución pola contía das mesmas e pola tardanza en cobralas.

Restos da becerra. AXM

Pena explica que o mesmo gandeiro pode ter unha sorte dispar. “Eu sempre dou parte a Medio Ambiente. O ano pasado cobrei por un poldro, e nese caso bastante ben valorado. Pero no caso desta becerra”, que taxa en arredor de 700 euros, “xa a teño que dar por perdida, porque a atopei varios días despois do ataque”, lamenta o gandeiro.

O titular da explotación pide unha maior flexibilidade á hora de conceder estas achegas, para as que se require presentar a solicitude como máximo 72 horas despois do ataque. “Estiven buscando a vitela venres, sábado, domingo e luns. Se cobro algún diñeiro por ese esforzo compensa, pero agora é tempo perdido, no que debía estar traballando”, remarca.

“Entre as dúas reses irán aló máis de 1.000 euros, e non me van perdoar o seguro de accidentes nin de recollida de animais”, expón.

UNHA BATIDA, O PASADO 18, NON CAPTUROU EXEMPLARES

Outra das razóns polas que o Concello valadourense pediu publicamente aos gandeiros que denuncien é que dar parte dos ataques pode favorecer que a Xunta de Galicia autorice unha batida, medida que conta con popularidade entre os gandeiros, porque consideran que a poboación de lobos vai en aumento.

“Está a haber ataques por toda a serra do Xistral, en Cospeito, mesmo en Celeiro“, enumera Pena, que cre que “se hai tantos ataques non é cousa dunha manada”.

As asociacións ecoloxistas, pola súa banda, remarcan que a medida pode ser contraproducente pois, aseguran, pode descabezar a manada e producir un aumento dos ataques pola ausencia de líderes experimentados.

Segundo expón Pena, a Xunta autorizou unha batida -para menos de 30 participantes- o pasado 18 de agosto, na que non se capturou ningún exemplar. “Non conseguimos nada, porque déusenos permiso para un só animal e os cazadores ían con medo de matar máis dun lobo e ser sancionados”, explica López.

Os ataques soen repuntar no verán, momento do nacemento dos poldros novos, ata outubro, cando os cachorros do lobo comezan a ir coa manada. A principios do pasado outono, os alcaldes do Xistral uníronse para reclamar ao Goberno galego unha solución para a ferida aberta da, por agora, difícil convivencia entre o cánido e o ser humano que vive na montaña.

RESPOSTAR

Please enter your comment!
Please enter your name here