EFE. O PSdeG-PSOE e mailo Bloque Nacionalista Galego (BNG) expresaron a súa disposición a iniciar unha “negociación política desde cero” para reeditar un goberno bipartito no concello do Valadouro, onde a coalición saltou polo aire a principios de xullo por mor das desavinzas entre ambas formacións que levaron ao alcalde, o socialista Edmundo Maseda, a retirarlles as competencias aos edís do Bloque.

Maseda, que desde entón goberna en minoría e sen retribución, recoñeceu que ambos partidos tratarán de buscar “un entendemento” para restablecer a coalición e formar un bipartito “como o dos últimos catro anos”, porque considera que funcionou “razoablemente ben”.

Pola súa banda, o portavoz nacionalista, Eduardo Chao, confirmou que o alcalde xa se puxo en contacto con eles para iniciar esas conversas, ademais de recoñecer que os nacionalistas están “abertos a calquera negociación”.

AMBOS PARTIDOS VALORAN O ANTERIOR MANDATO

As negociacións, que comezarán ao longo desta semana, deberían comezar, dixo, con “mentalidade para chegar a un acordo”. Desde o seu punto de vista, o último mandato foi “positivo”, polo que confía en que se poida reeditar o goberno bipartito.

Mediante un decreto da alcaldía, asinado polo propio Edmundo Maseda o pasado 1 de xullo, ao que EFE tivo acceso, o rexedor local revogou o nomeamento dos edís Eduardo Chao González -responsable do área de Cultura, Normalización Lingüística e Obras- e Eliseo Teijeiro -Área de Servizos Sociais e Turismo- como tenentes de alcalde da corporación municipal.

Así mesmo, nese mesmo decreto o alcalde de Ou Valadouro realizou unha redistribución das competencias municipais entre os catro edís socialistas, para conformar un novo goberno en minoría, no que o propio rexedor asumiu Obras, Urbanismo, Vivenda, Facenda Municipal, Infraestructuras, Industria e Comercio, Persoal e Protección Civil.

AS RETRIBUCIÓNS, FONTE DE POLÉMICA

As retribucións foron a principal fonte de controversia entre as dúas formacións, que chegaron a un acordo para que cada unha dispuxese de 30.000 euros para destinar aos seus concelleiros con dedicación. Con todo, o PSOE reivindicou que o pacto incluía a esixencia de que un edil de cada partido tivese unha liberación, cando os nacionalistas quixeron aprobar dous salarios por servizos a tempo parcial.

En xullo, o BNG chamou a “negociar desde cero” un goberno en coalición, unha proposta que foi ben acollida no seo socialista.

SEIS EDÍS ENTRE AS DÚAS FORMACIÓNS

Nas últimas eleccións locais o PSdeG-PSOE conseguiu catro edís na corporación e foi a forza máis votada, seguida polo PP cos mesmos concelleiros, o BNG con dous e Udival cun. Así, a reedición do bipartito parece o escenario máis probable, dada a difícil gobernabilidade do Concello se socialistas e nacionalistas non chegan a un acordo.