Como cada venres, o Xornal da Mariña repasa a axenda cultural e de ocio da fin de semana.
BARREIROS
O grupo teatral cervense O Bordelo porá en escena o domingo a obra ‘Toluras de proveito‘. Será no centro sociocultural Manuel Díaz Sampedro, a partir das 18.00 horas.
O BNG impulsa este domingo, desde as 12.00 horas na praza do Concello, un acto lúdico-reivindicativo para reclamar a cobertura de pediatría nos municipios de Barreiros, Mondoñedo e Lourenzá.
Haberá música para todos os públicos con Pakolas e actividades para nenos. De darse mal tempo, o evento celebrarase no centro sociocultural.
BURELA
Este venres, a partir das oito da tarde, Pepe Peinó presenta a súa novela ‘A Fuxida‘ na librería Nobel.
O xerente da Organización de Produtores Pesqueiros (OPP) Lugo, Sergio López, a directora xeral de Pesca, Mercedes Moreda, e o catedrático de Dereito José Manuel Sobrino participarán o sábado nun foro sobre o impacto do Brexit no sector pesqueiro.
Novas Xeracións de Burela, que pechará a conselleira, Rosa Quintana, e comezará ás 11.00 horas na casa do mar de Burela.
Tamén o sábado, o Pescados Rubén Burela FSF recibirá ao Viaxes Amarelle no derbi galego da Liga Foro 16 Feminismo. O encontro comezará ás 17.00 horas.
As discípulas de Julio Delgado e máis Lucas queren afianzar o seu liderado na máxima categoría e seguir a súa impecable traxectoria na casa, onde non cederon un só punto.
CASTROPOL
O grupo de teatro barreirense Ollomao recreará a peza ‘Enciclopedia Álvarez‘ na casa da cultura de Castropol. A obra comezará ás 20.30 horas.
FOZ
O venres continúa o Campañazo da Acia de Foz. Cada xornada póñense en xogo 600 euros, 300 para o primeiro que cante bingo e 300 para o resto dos cartóns.
Susana Álvarez ofrecerá un monólogo o sábado, desde as 20.00 horas, na cafetería Anduriña.
MONDOÑEDO
Mondoñedo será o epicentro da narración oral galega, cun encontro que incluirá un espectáculo de contacontos de balde no auditorio Pascual Veiga, o sábado a partir das 20.30 horas.
RIBADEO
O teatro de Ribadeo acollerá este sábado, desde as 20.00 horas, a proxección da longametraxe ‘Nove de novembro‘, de Lázaro Louzao. Trátase da primeira película rodada en galego sobre unha relación homosexual.
O domingo, a cantautora focega Ugía Pedreira ofrece un obradoiro de arrolos. A actividade, pensada para nenos de entre cero e tres anos, comezará ás 17.30 horas no teatro. Disporanse 20 prazas para crianzas con acompañante, a tres euros.
