Elena Candia, Jesús Novo e Javier Jorge Castiñeira serán os tres deputados do Partido Popular (PP) na corporación provincial polo Partido Xudicial de Mondoñedo.
A Xunta Electoral Zonal (XEZ) de Mondoñedo convocou para o vindeiro xoves a elección dos deputados provinciais do Partido Xudicial.
A alcaldesa de Mondoñedo e presidenta do PP lucense repetirá como deputada provincial e todo parece indicar que tamén como voceira do partido conservador na Deputación.
Candia, que gañou con maioría absoluta as eleccións locais no municipio mindoniense, asumiu a presidencia do goberno provincial en xuño de 2015, logo de que as desavinzas entre Manuel Martínez e o PSdeG-PSOE lle desen o mando da institución, aínda que unha moción de censura en outubro dese mesmo ano devolveulle o poder aos socialistas.
Novo, pola súa banda, volve á Deputación despois de exercer como deputado provincial entre 2011 e 2015. O alcalde do Vicedo demostrou de novo nos pasados comicios locais que é un valor seguro para o PP, renovando maioría absoluta.
Finalmente, Castiñeira, rexedor de Foz entre 2011 -cando recuperou a alcaldía para o PP tras 16 anos de mandatos socialistas- e 2019, foi un dos dous candidatos do PP que perdeu o bastón de mando nas eleccións municipais do 26 de maio. O outro foi o rexedor de Barreiros, Alfonso Fuente Parga.
O ex alcalde focego vivirá a súa primeira experiencia como deputado provincial na vindeira lexislatura.
SALGUEIRO E YANES GINZO NON SEGUEN
Novo e Castiñeira substituirán como deputados provinciais a Demetrio Salgueiro, que continúa como alcalde de Xove con maioría absoluta, e José Manuel Yanes Ginzo, rexedor de Trabada desde 1991 a 2015.
Yanes Ginzo, que deu o relevo a José María Fernández como candidato do PP trabadense ás eleccións municipais de 2019, anunciou este venres a súa intención de deixar a presidencia do partido conservador a nivel local, que ostentaba desde 2001. Será unha xestora a que asumirá o mando ata que a dirección provincial nomee sucesor.
Tamén foi deputado provincial durante dez anos (lexislatura 2007-2011, lexislatura 2011-2015 durante os anos 2013-2015 e lexislatura 2015-2019).
RELEVO NO PP TRABADENSE
Ginzo ponse a disposición da dirección para facilitar o relevo “e axudar no que faga falta”. “A nivel persoal chegou o momento de deixar paso. Fágoo convencido porque toca vivir outra etapa na miña vida. Con todo, seguirei estando aí porque, por riba de todo, son un home de partido”, afirma.
![](https://xn--xornaldamaria-tkb.gal/wp-content/uploads/2019/07/jose_yanes_0.jpg)
Candia, pola súa banda, salienta que “Ginzo foi un excelente alcalde e un excelente compañeiro na Deputación, polo que só teño palabras de cariño e de agradecemento hacia el. Agora iniciaremos o proceso para renovar a presidencia, buscando aos mellores para fortalecer o Partido Popular en Trabada e traballar polos intereses dos veciños”, conclúe.
LOUREIRO E MAYRA GARCÍA, POLO PSOE
Por agora, só trascenderan as representantes do PSdeG-PSOE, que presumiblemente gobernará o ente provincial en coalición co BNG. A alcaldesa de Viveiro, María Loureiro, e a rexedora de Trabada, Mayra García Bermúdez, representarán aos socialistas mariñaos en San Marcos.
O BNG DECIDE ARESTORA
O Bloque Nacionalista Galego elixe nestes intres nunha asemblea en Foz o deputado provincial polo Partido Xudicial de Mondoñedo que lle deron as urnas o pasado 26 de maio. Unha decisión chave, posto que o representante da formación frontista entrará presumiblemente no goberno.