A Semana Santa arrincou esta fin de semana en Galicia. As súas celebracións relixiosas con actividades e procesións que son un valor seguro á hora de atraer turistas ata a comunidade.
Así, e aínda que a inestabilidade do tempo non permitiu anticipar cifras ata os últimos días, os aloxamentos hoteleiros galegos en xeral confían en alcanzar durante os días festivos niveis de ocupación do 80%, superiores aos do ano pasado e impulsados polas últimas xornadas de sol.
Con todo, os datos son aínda mellores se se ten en conta aqueles lugares nos que a Semana Santa ten máis tradición, como é o caso de Ferrol e Viveiro, onde os establecementos xa colgaron o cartel de completo para as xornadas festivas e o cheo chega mesmo a municipios limítrofes. Os datos tamén son moi positivos noutras áreas onde a Semana Santa ten gran arraigamento, na costa e nas capitais.
DE INTERESE TURÍSTICO INTERNACIONAL
Galicia ten sete celebracións de Semana Santa coa distinción de interese galego: a Festa do Santísimo Cristo de Fisterra, a Semana Santa de Cangas, a Semana Santa de Paradela (Meis), a Semana Santa de Betanzos, a Semana Santa de Mondoñedo, a Semana Santa de Santiago de Compostela e a Semana Santa de Lugo.
Ademais, dous destas celebracións de Semana Santa de Galicia contan coa distinción de Festa de Interese Turístico Internacional, a de Viveiro (desde o 2013) e a de Ferrol, que agrupan, ademais, a maior cantidade de visitantes que se desprazan nestas datas para participar nas súas procesións.
Segundo as previsións da organización, a Semana Santa de Viveiro move, de media, unhas 30.000 persoas, acadando unha ocupación hoteleira no municipio do 100%. Preto de 3.500 confrades e 35 pasos participarán nas 15 procesións de Semana Santa viveirense.
A celebración arrincou o pasado sábado co pregón, a cargo de José Manuel González Páramo, doutor e dobre mestrado en Economía pola Universidade de Columbia.
QUINCE PROCESIÓNS
Este Domingo de Ramos, sairá á rúa ás 12,00 horas a procesión da entrada de Jesús en Xerusalén, coñecida como ‘A Borriquita‘, que partirá da parroquia de Santiago e terminará coa bendición de ramos na Praza Maior. Ás 19.30 horas será a quenda do Ecce Homo, desde a Igrexa de San Francisco.
O luns, ás 21.00 horas, as rúas de Viveiro vivirán a tradicional ‘Tamborrada’, na que este ano participarán usuarios da Asociación de Pais de Persoas con Discapacidade Intelectual (Aspanane).
O martes, ás 21.00 horas, arrincará da Igrexa de San Francisco o Via Crucis de Mulleres, mentres que ao día seguinte, ás 22.00 horas, farao o Via Crucis de Homes.
O xoves, día 18, ás 19.30 horas arrincará de San Francisco a procesión da Última Cea, e ás 22.00 horas a do Prendemento. De madrugada, ás 00.30, sairá da Capela da Misericordia a procesión homónima.
O venres, as procesións de Viveiro iniciaranse ás 10.00 horas co Encontro, na Praza Maior. Ás 12.00 horas será o Sermón do Sete Palabras, desde San Francisco; ás 18.30 horas sairá de Santa María a do Descendemento e ás 19.30 horas será a quenda do Santo Enterro, tamén desde a Igrexa de Santa María.
Tamén o día 19 haberá unha procesión extraordinaria da Paixón con motivo do 75 aniversario da Confraría do Santísimo Cristo da Piedade, que sairá ás 22.00 horas de San Francisco. Para pechar a xornada, celebrarase a medianoite o Sermón da Soidade, seguido dunha procesión.
Finalmente, o sábado ás 19.30 horas sairá a procesión da Esperanza da Resurreción, desde San Francisco, o mesmo emprazamento desde o que arrincará o Via Crucis do domingo, ás 19.30 horas. Antes, ás 12.00 horas, a procesión do Encontro de Resurrección partirá de Santa María.
EN FERROL, 24 DESFILES
En Ferrol haberá máis de 20 procesións desde este domingo. Os días máis destacados son o Mércores, Xoves e Venres Santo, nos que miles de persoas se dispoñen ao longo das rúas dos barrios de Esteiro e A Magdalena para contemplar os maiores e máis vistosos desfiles procesionais da Semana Santa ferrolá.
