A residencia da Pontenova continúa pendente da licitación das obras de construción

Vista aérea da Pontenova. AXM

Son dous obxectivos irrenunciables para os gobernos locais, que fixaron os centros de maiores como a principal meta da presente lexislatura, pero as residencias de Ourol e A Pontenova deberán agardar. A Deputación de Lugo expón que o xeriátrico pontenovés, cunha tramitación máis avanzada, continúa pendente da licitación do proxecto de construción, que o ente provincial espera aprobar “nas vindeiras semanas“. No caso do servizo do municipio ourolés, non hai data para concretar os seguintes pasos, unha vez foi asinado o convenio co Concello para a reforma do colexio.

Fontes de San Marcos oncretaron que se está a traballar na licitación das obras da residencia da Pontenova, que “previsiblemente se aprobará en Xunta de Goberno nas vindeiras semanas”. Neste caso, o proxecto está redactado e finalizado. O convenio formalizado entre o goberno provincial e o Concello pontenovés para a construción do edificio ascende a 2,2 millóns de euros -dos que o executivo municipal achegaría 300.000 euros-. O prazo de execución dos traballos, segundo concretan as mesmas fontes, é de doce meses.

A apertura da residencia da Pontenova é “o principal obxectivo” na presente lexislatura para o executivo municipal socialista, segundo afirmou o alcalde, Darío Campos, no pleno de investidura. Con todo, por agora non se cumpriron as previsións realizadas a finais da pasada, cando se estimaba que as obras de construción poderían iniciarse nese mesmo ano 2018.

En marzo de 2019 Concello e Deputación asinaron a escritura dos terreos -con máis de 2.200 metros cadrados-. Trátase dun espazo na contorna urbana, a 500 metros do núcleo pontenovés, preto do río Eo e rodeado de zonas verdes, coñecido como a Chousa de Vilaoudriz. O centro de maiores da Pontenova ofrecerá unhas 50 prazas30 de residencia e 20 de centro de día.

EN OUROL ASINOUSE UN CONVENIO PARA REFORMAR O ANTIGO COLEXIO

No que atinxe á residencia de Ourol, o convenio foi asinado en xuño de 2019, cun investimento de 1,6 millóns -dos que as arcas municipais achegarán 200.000 euros-. O goberno provincial asegura que se están a “pechar pasos administrativos” co executivo local, pero non ofrece unha data para o inicio do seguinte trámite dentro deste proxecto.

Neste caso, non se trata da construción dun centro de maiores, xa que a intención é reformar o CEIP Vicente Casabellainutilizado desde que a Xunta de Galicia pechou o colexio no 2015. O Concello xa entregou á Deputación a certificación catastral da parcela e a resolución da Consellería de Educación sobre a desafección do inmoble.

Desde a Deputación expoñen que se avanzará “progresivamente” na posta en marcha dos centros de maiores, priorizando aqueles que están nunha fase máis avanzada. Segundo anunciou o propio presidente, o socialista José Tomé, na presentación dos orzamentos para 2021, o executivo provincial prevé abrir neste ano “CastroverdePedrafitaMeira e Navia de Suarna“. O xeriátrico de Pedrafita do Cebreiro abrirá a vindeira primavera, segundo asegurou recentemente o deputado de Promoción Económica, Pablo Rivera.

As residencias da rede propia, como as de Trabada ou Ribadeo, xa en funcionamento, foron a gran aposta do executivo socialista na anterior lexislatura. Segundo os convenios asinados cos gobernos municipais, a Administración asume parte do custo das prazas, blindando que os usuarios teñan sempre dispoñible un mínimo dun 25% das súas pensións.

O GOBERNO PROVINCIAL DEBERÁ PECHAR UN ACORDO COA XUNTA PARA A XESTIÓN DOS CENTROS

Con todo, no novo mandado, a Deputación deu marcha atrás na súa idea de xestionar os servizos nos novos centros de maiores e non adquirirá novos compromisos de construción, ao entender tanto o PSdeG como o BNG, que forman o bipartito de goberno, que os orzamentos que requiren estes xeriátricos non son asumibles polas arcas provinciais, máis cando as competencias en materia de servizos sociais pertencen á Xunta de Galicia.

Esta situación conlevou polémica, asegurando o PP que os proxectos non rematados na anterior lexislatura non se ían acabar. A controversia política chegou ao pleno provincial, que en agosto do 2019 abordou a situación de varios proxectos, entre eles os da Pontenova e Ourol, pero tamén os de Castroverde, Pedrafita, Meira e Navia de Suarna, e os de A Fonsagrada, Becerreá, Cervantes, O Courel, Guitiriz, Pantón, A Pobra do Brollón, Portomarín e Ribas de Sil. Tomé garantiu publicamente a construción dos xeriátricos pactados, aínda que urxiu á Xunta de Galicia a asumir a súa xestión.

O goberno provincial non se pronuncia polo momento sobre os avances á hora de conquerir un acordo co Executivo autonómico para que asuma estes servizos.

RESPOSTAR

Please enter your comment!
Please enter your name here